Sinaturas contra a gasolineira diante do colexio Vales Villamarin

Os/as abaixo asinantes amosamos a nosa oposición á solicitude de licenza para a apertura dunha “Estación de Servicio”, sita na Avda. Fraga Iribarne s/n (parcela 327 do polígono 11), por todo isto, en cumprimento do Art. 8.3 do Decreto 133/2008 de 12 de xuño formulamos as seguintes alegacións que determinan a falta de idoneidade do emprazamento proposto para esta instalación:

1ª) Esta instalación atoparíase no eixo dunha zona residencial, escolar e deportiva, moi perto dun centro de ensino e unha escola infantil, entrando claramente en conflicto con esta zona e sendo lesiva para a mesma, o que determina a súa incompatibilidade. Estamos a referirnos ao CEIP Vales Villamarin, ao Francisco Aguiar, asi como a unha escola infantil que se atopa en fase de construcción e a zona deportiva.

2ª) O proxecto incumpre as limitacións previstas no artigo 35 da Lei 9/2002, de 30 de decembro, de Ordenación Urbanística e Protección do Medio Rural de Galiza, no tocante aos movementos de terra que alteren a topografía dos solos rústicos.
3ª) Perto da citada gasolineira atopase un antigo camiño real e unha capela catalogada que se veríann afectadas pola mesma, do mesmo xeito, existe unha fonte a escasa distancia da parcela incumprindo a normativa que fai incompatible estes usos coa existencia de cursos de auga.

4ª) O proxecto carece dun estudo de avaliación do impacto da gasolineira na estrada e, no seu caso, as necesarias medidas correctoras, tal e como esixe a Lei 4/1994 de estradas de Galiza. Así mesmo, o proxecto carece do preceptivo estudo de impacto no tráfico viario da zona de influencia da instalación e a proposta de ordenación para correxir o mesmo.

Por todo isto, SOLICITAMOS do Concello de Betanzos que admita as presentes alegacións e, previos os trámites pertinentes, informe negativamente e desestime a solicitude de licenza para a apertura dunha “Estación de Servicio” na Avda. Fraga Iribarne s/n (parcela 327 do polígono 11).